Maamul Goboleedka Puntland ayaa wuxuu shaaca ka qaaday in uu xoog ku soo furtay Doon ay ku rarnaayeen Badeecooyin ganacsi oo ku sii jeeday Dekedda Magaalada Boosaaso, taasi oo ay qafaasheen Kooxo Burcad Badeed ah.

Wasiirka Amniga Puntland C/llaahi Siciid Samatar ayaa sheegay in Ciidamada Ammaanka Puntland ay weerar ku qaadeen Kooxo Burcad Badeed ah oo Xeebaha Puntland ku heystay Doon Badeecooyin ganacsi u waday Ganacsato Reer Boosaaso, wuxuuna caddeeyay in ay gacanta ku soo dhigeen 7 Burcad Badeed ah oo 3 ka mid ah ay dhaawac yihiin.

Wasiirka wuxuu intaas ku daray in Doontan oo lagu magacaabo Al-Khaleej, isla markaana wadatay Calanka Imaaradda Dubai  ee Dalka Isu Tagga Imaaraadka Carabta ay Kooxaha Burcad Badeedka ah ka qafaasheen meel 160 Mile u jirta Xeebah Soomaaliya, hayeeshee aysan Burcad Badeedka u suurtagelin ujeedadii ay lahaayeen.

Inkastoo Ciidamada Ammaanka Puntland ay dagaal la galeen Kooxaha Burcad Badeedka, isla markaana ay ka itaal roonaadeen hadana Wasiirka Ammaanka Puntland C/llaahi Siciid Samatar waxaa uu sheegay in aysan jirin awood baaxad leh oo ay kula dagaalami karaan dhamaan kooxaha Burcad Badeedka ah, sidaas darteedna wuxuu ka codsaday Beesha Caalamka in ay gacan ku siiso sidii Xeebaha Soomaaliya looga sifeyn lahaa Kooxaha Burcad Badeedka ah.

Si kastaba arrintu ha ahaatee, Doon kuwa Kalluumeysiga ah oo laga leeyahay Dalka Spain ayaa waxay haatan  ku af-duuban tahay Xeebaha Soomaaliya, waxaana Doontaas heysta Kooxo Burcad Badeed ah oo weliba lacag madax furasho ah dalbaday, walow halka lagu heysto Doontaas uu ku soo wajahan yahay Markab dagaal oo ay Dowladda Spain leedahay, kaasi oo markii Doontan la qafaalanayay ku sugnaa Badda Cas.

Xigasho:Hiiraan.com              

Wasiirrada Arrimaha Gudaha iyo Arrimaha Dibadda Xukuumadda Federaalka Soomaaliya oo ka hadlay dagaalladii Sabtidii iyo Axaddii dhaweyd ka dhacay Xaafado ka tirsan Degmooyinka Huriwaa iyo Yaaqshiid ee Gobolka Banaadir ayaa siyaabo kala duwan uga hadlay dagaalladaas.

Wasiirka Arrimaha Gudaha Xukuumadda Federaalka Soomaaliya Muuse Nuur Amiin oo wax laga weydiiyay waxa uu ka ogyahay dad ay Ciidamada Dowladda iyo kuwa Itoobiya ku dileen Xaafadda Waxar Cadde ee Degmada Huriwaa, gaar ahaan Masjidka Al-Hidaaya, ayaa wuxuu sheegay in haddiiba ay jirto in ay arrintaas dhacday ay qalad tahay, isla markaana ay mas’uuliyadda dhibaatadaas garbaha saarnayaan dhinacyadii dagaalamayay.

“Waxa unbaa keenay in Masjidka ay Ciidamada Itoobiya galaan, mana u maleynayo in Ciidamadu Dad rayid ah dilayaan, waxaase shaki ku jiraa in ay kooxaha wax iska caabinta waday ay Masjidka galeen, waxaanse ka xunnahay in ay Masjidka bannaankiisa ama gudihiisa ay Dad Rayid ah ku dhintaan”ayuu yiri Muuse Nuur Amiin.

Wasiirka Arrimaha Gudaha Xukuumadda Federaalka Soomaaliya waxaa uu sheegay in la baarayo eedeymaha loo soo jeeidyay Ciidamada Itoobiya iyo kuwa Dowladda Federaalka ee ah in ay xasuuq ka geysteen Masjidka Al-Hidaaya, wuxuuse ku cel celiyay  in uu maleynayo inay masjidka gabaad ka dhigteen Kooxaha wax iska caabinta ee dagaalka kala soo horjeeda Ciidamada Dowladda iyo kuwa Itoobiya.

Laakin Hadal midkaas ka duwan waxaa bixiyay Wasiirka Arrimaha Dibadda Xukuumadda Federaalka Soomaaliya Cali Axmed Jaamac Jengeli oo sheegay in aysan jirin wax xasuuq ah oo ay Ciidamada Dowladda iyo kuwa Itoobiya ka geysteen Masjid iyo meelo la mid ah, wuxuuna carrabka ku dhuftay in Masaajidda ay yihiin meelo dagaalka ka caagan.

“Wararkaas waxaa fidiya warbaahinta, mana ahan kuwo ay wax ka jiraan, haseyeeshee haddii ay dad dembilayaal ay Masjidyada galaan Ciidamada Xaq ayay u leeyihiin in ay soo qabtaan”ayuu yiri Wasiirka oo isagoo ku sugan Dalka Mareykanka u waramayay Laanta Afka Soomaaliga ee BBC-da.

Wasiirka oo sii hadlayay waxaa uu sheegay in muddo bilooyin ah weerar lagu hayay Dowladda Federaalka iyo Ciidamada Itoobiya, wuxuuna sheegay in ay awood u isticmaalayaan meelaha ay ku jiraan Kooxaha ka soo horjeeda Dowladda Federaalka, isagoo gaashaanka ku dhuftay in dagaallada socda ay wax u dhimayaan dadaalladii dib u heshiisiinta ahaa ee laga dhex waday Dowladda iyo Mucaaradka ka soo horjeeda ,”gacan wada hadallada ayaan ku wadeynaa, gacanna waan isku difaaceynaa”ayuuna yiri Wasiirka Arrimaha Dibadda Soomaaliya Cali Axmed Jaamac Jengeli.

Ugu dambeyntiina, dhawaan ayay ahayd markii Ra’iisal Wasaaraha Xukuumadda Federaalka Soomaaliya Nuur Xasan Xuseen (Nuur Cadde) oo Muqdisho shir jaraa’id ku qabtay uu sheegay in dagaallada Muqdisho ka socda ay yihiin kuwo u dhaxeeya kooxo sida uu yiri cadaw ah oo soo weeraray Ciidamada Dowladda iyo kuwa Itoobiya iyo Ciidamadaas oo is-difaacaya

Xigasho:hiiraan.com